Ginpaandaman ni Philippine National Police (PNP) Chief General Jose Melencio Nartatez Jr ang mga managers kag personnel sang mga gasolinahan nga involve sa hoarding sang produktong petrolyo sa tunga sang pagsaka sang presyo bangud sa epekto sang nagapadayon nga kinagamo sa Middle East.
Suno sa iya, ginabantayan sang ila mga intelligence units ang mga bodega para sa posibilidad sang hoarding kag kaangay nga iligal nga aktibidad.
Nagpaandam naman ang hepe nga dakpon nila ang sin-o man nga madakpan nga illegal nga nagatago sang supplies agud magtaas ang presyo sang produktong petrolyo.
Dugang pa niya, ang Criminal Investigation and Detection Group, Maritime Group, kag Highway Patrol Group ang gin-assign sa pagbantay sang posible hoarding activities.
Pahayag pa niya, nagsugod man ang law enforcement agency sa pagpakig-angot sa Department of the Interior and Local Government (DILG) agud ma-assess kun bala nagasunod ang mga nagabaligya sang produktong petrolyo sa ila mga nasakupan sa direktiba sang Department of Energy (DOE).
