ROXAS CITY – Ginapadalman sa karon sang Roxas City Police Station ang imbestigasyon sa kamatayon ni Renante Cepra alyas Nonoy nga yara na sa state of decomposition sang nasapwan sa isa ka maligwin nga lugar sa Sitio Cassandra, Barangay Punta Tabuc, sining siyudad.
Ginpahayag ni Police Lt. Colonel Dante Tayco nga negatibo ang resulta sang biktima sa ginpatigayon nga physical examination sa diin wala sang may nakita nga pilas sa lawas sang kolektor.
Ginpahayag ni Tayco nga paha ang gingamit sang biktima sa ginaalegar pag-utas sini sa iya kabuhi.
Apang indi sa gihapon kumbinsido ang pamilya ni Cepra nga nagpanginmatay ang ila himata bangud nagadapat pa ang tiil sini sa duta sang nasapwan ang iya nga bangkay.
Samtang, isa man sa ginalantaw nga motibo sang kapulisan sa pagpanginmatay sang biktima sang nahibaluan sini nga naghikog ang utod sa Metro Manila.
Sa karon, padayon ang imbestigasyon sang kapulisan agud matul-id ang rason sang pagkamatay sang biktima.
