Wala sang may na-monitor nga anuman nga seryoso nga pamahog sa seguridad ang Philippine National Police (PNP) kaangut sa pagahiwaton nga National and Local Elections buwas nga adlaw, Mayo 12.
Ini ang ginpahayag ni PNP Spokesperson P/Brig. Gen. Jean Fajardo sa diin gin siling man sini nga preparado na ang PNP para sa pagbantay sa midterm polls.
Pahayag niya, sa kabug-usan nga election period nangin malinong ini apisar nga may pila ka nabalhag nga mga insidente sang kalakasan tuga sang banggianay sa pulitika.
Nahibaluan nga una na nga ginpaidalom sang PNP sa full alert status ang bug-os nga puwersa sini agud siguruhon ang malinong kag matawhay nga paghiwat sang eleksyon.
Yara sa 163,000 nga pulis ang gin-deploy sa bug-os nga pungsod.
Sa karon, 40 ang nabalhag nga Election Related Incident (ERIs), 26 diri ang bayolente kag 14 naman ang non-violence.
Kadam-an naman sa mga bayolente nga insidente nga may kahilabtanan sa eleksyon ang nagikan sa Bangsamoro Autonomous Region in Muslim Mindanao (BARMM) nga nakabalhag sang walo ka insidente kag Cordillera Administrative Region (CAR) nga may pito naman ka kaso.
Padayon ang monitoring sang PNP ilabi na sa adlaw sang botohan, isipay kag tubtob sa mapungko ang mga nagdaog nga kandidato.
