Wala sang na-monitor ang Philippine National Police (PNP) sang anuman nga seryoso nga pamahog sa seguridad sa pagsaulog sang Paskwa ukon sini nga holiday season.
Sa pihak sini, ginpahayag ni PNP Spokesperson P/Brig. Gen. Jean Fajardo nga nagapabilin sa heightened alert status ang PNP sa pagsaulog sang Paskwa kag Bag-ong Tuig nga magadugay tubtob sa Traslascion sang Itom nga Nazareno sa Enero 9, 2025.
Suno kay Fajardo, sumugod pa sadtong Disyembre 15, yara na sa heightened alert ang PNP bilang paghanda sa mahaba nga tinion sang kapaskwahan kag magapadayon ini tubtob sa piyesta sang Itim nga Nazareno.
Yara sa 40,000 naman nga mga pulis ang gin-deploy sa bug-os nga pungsod agud magbantay sa mga bus terminals, pantalan kag paluparan sa ginalauman nga exodus sang mga tawo subong nga Paskwa samtang nagpahamtang man ang PNP sang mga Police Assistance Desk malapit sa mga simbahan kag komersiyal nga establisyemento. Nagpahamtang man ang PNP sang K9 units sa mga pampubliko nga terminal agud magbulig sa pag-usisa sang bagahe sang mga pasahero.
Samtang, nakatalana man nga magselyo ang PNP sa punta sang mga armas sang mga pulis agud siguruhon nga wala sang matabo nga indiscriminate firing sa pagsug-alaw sa Bag-ong Tuig.
Ginpanugyanan naman ni Fajardo ang publiko nga likawan ang magpalupok sang firecrackers sa mga residential area agud malikawan ang katalagman kasubong sang sunog.
Pahayag pa sini nga may mga ginpahamtang nga ‘firecrackers zone” sa mga komunidad nga makit-an ang madinuagon nga lightings nga pwede gid lantawon sang mga tawo.
Liwat man nga ginapahanumdom sang PNP sa publiko nga likawan ang paggamit sang mga ginadumilian nga mabaskog kag makatalagam nga palupok kasubong sang boga, superlolo, Binladen, super bawang kag iban pa para malikawan ang disgrasya.
