Padayon nga ginapadalman ang sang katapo sang Pontevedra Municipal Police Station ang imbestigasyon sa nagluntad nga pagpangluthang sa isa ka senior citizen sa Sito Mantawad, Barangay Malag-it, Pontevedra Capiz.
Sa interview sang Bombo Radyo sa hepe sang Pontevedra MPS nga si PMAJ Gregg Anthony Salbang, ginpahayag sini nga matapos makabaton sang report ang ila talatapan gilayon nila nga ginpadulungan ang lugar kung sa diin nagluntad ang insidente.
Suno kay Salbang, nga base sa ila imbestigasyon isa sa mga ginalantaw nga motibo ang indi pag-intindihanay sa magtimbang nga bahin kabangdanan nga nagresulta sa pagpangluthang.
Mahibaluan nga narekober sa lugar ang isa ka basiyo nga bala sang ginapatihan. 48 caliber nga armas luthang.
Ginapasiguro man sang hepe nga indi sila mag-untat sa ila operasyon tubtob nga indi madakop ang suspek sa krimen.
Matandaan nga nag-angkon sang patal nga pilas sa dughan ang biktima nga ginkilala kay Josefina Asung 68-anyos, kag ang ginatudlo suspek ang ginkilala sa anay Barangay Kagawad nga si Jovannie Abulocion 46-anyos nga lunsay residente sang nasambit nga lugar.
Sa karon, padayon ang ginapatigayon nga hot pursuit operation sang Pontevedra MPS batuk sa suspetsado matapos makapalagyo matapos makumiter ang krimen.
