Nagpahayag sang tuman nga pagpangasubo ang lider sang Simbahan Katolika nga si Pope Leo XIV sa damlag lang nga pag-atake sang Israel sa isa ka simbahan sa Gaza kag nag-apelar para sa gilayon nga pag-untat sang ginatawag niya nga “barbarity” ukon kapintasan sa giyera sa Gaza.
Sang Huwebes sang aga natabo nga gin-igo ang isa ka Holy Family church nga nagpatay sa tatlo gikan sa ginabulubanta nga 600 Gazans nga nagapasilong didto kag ginkapilas sang iban pa kalakip ang mismo nga kura paroko nga si Fr. Gabriel Romanelli.
Sang Dominggo matapos ang pagpangamuyo sang Angelus prayer sa iya nga summer residence sa Castel Gandolfo, ginpangalanan kag ginpangamuyuan sang banal nga Santo Papa ang tatlo ka mga biktima nga sanday Saad Issa Kostandi Salameh, Foumia Issa Latif Ayyad, kag Najwa Ibrahim Latif Abu Daoud nga malapit suno sa iya kag sa ila nga pamilya.
Ginpat-od naman sang Santo Papa nga ang nasambit nga pag-atake ang isa lang sa nagapadayon nga military attacks batok sa mga sibilyan nga pumuluyo kag mga lugar sang sambahan sa Gaza. Kaangot sini, liwat nga nag-apela ang Holy Father para sa malinong nga pagsolbar sa kinagamo.
Ginganyat man sang Santo Papa ang international community nga tumanon ang humanitarian law kag respetuhon ang obligasyon nga protekatahan ang mga sibilyan subong man ang pagbawal sa kolektibo nga pagsilot, subong man ang indiscriminate use of force kag pwersahan nga pagpahalin sa mga pumuluyo.
Gintapos ni Pope Leo ang iya nga apela pamaagi sa paghatag sang mensahe sa Christian communities sa Middle East, nga iya nahangpan nga gamay lang ang ila nga mahimo sa tunga sang mabudlay nga sitwasyon subong kag ginpasalamatan ang mga ini sa ila nga pagiging saksi sa pagtuo.
Sa karon, naglab-ot na sa masobra 2 ka milyon nga mga pumuluyo sa Gaza ang na-displace bangud sa giyera nga yara sa ika-22 ka bulan na.
