VATICAN CITY – Nagapanawagan si Pope Leo XIV sa world leaders kag Catholics nga indi pagpabay-an ang mga pigado ilabi na nga ginaselebrar sang simbahan ang “Jubilee of the Poor”.
Sa misa nga ginpatigayon St. Peter’s Basilica, ginpahayag ni Pope Leo nga apektado sa gihapon ang simbahan sang madamo nga sahi sang kapigaduhon apang luyag sini nga mangin “mother of the poor” ang simbahan, ang lugar kun sa diin mabatyagan sang mga pigado nga welcomed sila kag ginasapupo sang maayo.
Matapos ang misa, nag-upod si Pope Leo sa pagpanyaga sa 1,300 nga mga pigado, homeless, disabled kag refugee guests sa sulod sang Vatican.
Nagahingyo ang Santo Papa sa mga lider sa bilog nga kalibutan nga pamatian ang ginahibi kag ginasinggitan sang mga pigado sa diin wala sang kalinong kun wala sang hustiya.
Suno sa iya, madamo sang tawo ang wala ginasapak sang sociodad lakip na ang mga migrants kag ang mga nagapangabuhi sang pigado.
Pahayag niya, ang kapigaduhon indi lang tuhoy sa kwarta sa baylo madamo sang tawo ang nagasuprer sang spiritual poverty kaangay sang pagbatyag sang pag-isahanon.
