ROXAS CITY-Nagakahangawa sa karon ang mga residente sang Portland, Oregan sa padayon nga wildfire sa Estados Unidos.//
Sa interview sang Bombo Radyo sa kay Bombo International Correspondent John Rey Dacles, tumandok sang Barangay Bailan, Pontevedra Capiz ginpahayag sini ginpaidalom na sa “Extreme Alert level-II” ang Oregon sang tinalikdan nga Lunes kasunod sang nasambit nga wildfire.
Suno kay Dacles nga ginhatagan na sang notisya sang gobyerno sang oregon ang mga residente nga nagapuyo malapit sa wildfire nga mabiya na sa ila nga mga panimalay.
Apisar nga malayo sa ila nga panimalay ang nasambit nga wildfire,ginpahayag ni Dacles makita sa guihapon ang madamol nga aso tuga sang sunog.
Magluwas diri, masimhotan man sa palibot ang mabaho nga aso gikan sa mga nagakasunog nga mga kahoy.
Gindugang pa sini nga nabudlayan sa pagpalong sang kalayo ang kapin 3,000 ka mga bombero sa lugar.
Ginpahayag sini nga may yara sang mag-lola nga napatay bangod sa padayon nga wildfire.
Samtang nagalaum naman ang mga residente sang Oregon nga magbubu ang ulan sa madasun nga inadlaw agud gilayon nga mapalong ang nasambit nga kalayo.
Sa karon ginabulubanta nga yara na sa kapin 207,000 ka hektaryas ang gintuga nga kahalitan sang nasambit nga wildfire.
