ROXAS CITY, CAPIZ- Ginahulat pa sa gihapon sang Commission on Elections (COMELEC) office ang desisyon ni Presidente Ferdinand Marcos Jr. may kaangtanan sa postponement bill nga ginduso para sa Barangay and Sangguniang Kabataan Elections (BSKE) 2025.
Sa interview sang Bombo Radyo kay Atty. Wil Arceño, Assistant Regional Director sang Commission on Elections Region 6, iya ginpahayag nga naka-depende pa sa Presidente kun i-veto ukon i-decline sini ang nasambit nga hagna.
Samtang, sa pihak nga wala pa sang pinal nga desisyon, nagapadayon ang COMELEC sa pagpreparar para sa Barangay and Sangguniang Kabataan Elections nga posible matabo sa Disyembre 1, 2025.
Apang, kun mag-abot ang tion nga pirmahan sang presidente ang hagna kag mangin isa na ka layi, ang BSKE ang patigayunon sa una nga Lunes sang Nobyembre 2026 kag magalawig na ang termino sang mga opisyales, halin sa tatlo ka tuig, mangin apat na katuig ang ila pag-pungko sa pwesto.
Nahibaluan nga bwas na nga adlaw Agosto 1 magaumpisa ang Voters Registration kag magatakop ini sa Agosto 10, 2025.
Pahayag pa ni Arceño, apisar nga wala pa sang pinal nga desisyon hanungod diri, magparehistro na nga daan ang mga botante.
Interviewed by Bombo Sunnie Mae Batencila
