ROXAS CITY – Nagapadayon ang preparasyon sang Capiz Government para sa nagahilapit nga Capiztahan 2024.
Sa interview sang Bombo Radyo kay Mr. Alphonsus Tesoro, pinuno sang Provincial Tourism and Cultural Affairs Office (PTCAO), suno diri yara na sa tunga-tunga ang preparasyon sang mga natungdan nga komitiba kalakip na ang mga nagkalain-lain nga Local Government Units (LGUs) para sa pinasahi nga selebrasyon sang Capiztahan.
Pahayag sini, target sang gobyerno probinsyal nga indi lang sa syudad sang Roxas maga-sentro ang selebrasyon kag dal-on sa mga kabanwahan ang maragtas sang Capiznon.
Gintuad man ni Tesoro nga may pipila ka mga bag-o nga aktibidades nga dapat bantayan sang mga pumuluyo ilabi na ang ‘Dance Drama’ nga ang konsepto amu ang kasaysayan sang probinsya sang Capiz.
Ini ang paga-pasakupan sang nagkalain-lain nga LGU’s ukon participating schools sa diin pagahatagan sang isa ka importante nga hitabo sa maragtas sang Capiz ang mga partisipante kag iga-akto pinaagi sa pagsaot.
Nagapati si Tesoro nga pinaagi sa mga kasubong nga kahiwatan mas makilala sang mga pumuluyo ang probinsya, kun ano ang mahimo sini maihatag sa mga masunod nga tinuig kag makilala indi lang sa Capiz kundi sa bug-os nga Pilipinas.
Mahibaluan nga target sang Capiz Government nga makilala ang probinsya bilang ‘Festival Capital of the Philippines’ kasubong sa mga kaiping nga kaprobinsyahan nga kilala sa ila tagsa ka mga festival.
Matandaan sang nanligad nga Capiztahan 2023, nakarekord ang Tourism office sang masobra 11,000 ka mga guest nga nagpadulong sa probinsya kag nagtinir sa mga nagkalain-lain nga accommodation establishments agud saksihan ang selebrasyon sang Capiztahan.
