Ginpasalig ni Presidente Ferdinand R. Marcos Jr. nga gilayon nga makabaton sang bulig ang mga pumuluyo nga apektado sang Bagyo Tino, matapos ginmanduan ang tanan nga ahensya sang gobyerno nga madasig nga magresponde sa nasambit nga kalamidad.
Suno kay Presidential Communications Office (PCO) kag Palace Press Officer Undersecretary Claire Castro, yara na sa mga apektado nga lugar ang mga ahensya sang gobyerno agud magdul-ong sang pagkaon, bulong, kag iban pa nga nagapanguna nga kinahanglanon.
Dugang pa ni Castro, gilayon nga nagpadala ang Department of Health (DOH) sang mga bulong, matinlo nga tubig nga ilimnon, hygiene kits, kag water containers sa Cebu, Aklan, kag Eastern Visayas pila sa mga apektado nga rehiyon.
Pahayag pa niya, padayon man ang monitoring sang DOH sa posible lahar threat sa Kanlaon Volcano bangud sa wala untat nga pag-ulan.
Sa pihak nga bahin, ang Department of Social Welfare and Development (DSWD) ang naghatag sang masobra 121,000 ka family food packs kag 1,600 ka ready-to-eat meals sa rehiyon sang CALABARZON, Bicol, Visayas, Caraga, kag pila ka bahin sang NCR kag Zamboanga. Naghatag man ini sang bulig pinansyal sa mga pamilya nga nadulaan sang mga pinalangga kag mainit nga pagkaon sa mga stranded nga pasahero kag motorista.
Samtang, ginreport ni DICT Secretary Henry Aguda nga ang ahensya nagapakig-angot sa mga mayor nga telecommunications companies nga Dito, Globe, kag Smart agud mapadasig ang pagbalik sang komunikasyon sa mga lugar nga ginhalitan sang bagyo.
