Ginpasalig ni President Ferdinand Marcos Jr. nga may yara sang bastante nga supply sang gatong ang pungsod sa sulod sang 51 ka adlaw, kadungan sang padayon nga tikang sang gobyerno sa pagpabilin sang bastante nga imbentaryo sang gatong sa tunga sang kinagamo sa Middle East.
Suno sa Presidente, nag-order ang Philippine National Oil Company-Exploration Corporation (PNOC-EC) 1.04 million ka bariles sang diesel, sa diin 142,000 ka bariles ang na-deliver subong nga semana kag ang nabilin ginalauman nga maga-abot subong nga bulan sang Abril.
Pahayag pa niya, P20 bilyon ang ginpagwa sang Department of Budget and Management (DBM) para sa pagbakal sang tubtob duha ka milyon ka dugang nga bariles sang langis.
Dugang pa iya, makadugang ini sang napulo ka adlaw sa buffer stock sang pungsod.
Nahibaluan nga una na nga ginpahayag ni Marcos nga bastante ang supply sang krudo sang Pilipinas tubtob sa Hunyo 30 sini nga tuig.
