Nagpaandam si Presidente Ferdinand Marcos Jr batuk sa mga kurakot nga opisyal kag indibidwal nga suno sa iya padayon nga naga-abuso sa poder.
Ang pahayag ginhimo sang Presidente matapos nga ginpangunahan ang pagdumdom sang National Heroes Day sa Libingan ng mga Bayani sa syudad sang Taguig.
Suno sa Presidente, ang korapsyon indi lamang pagpangawat sang kwarta sang pumuluyo, kundi pagguba man sang palaabuton sang mga pamatan-on kag pagdugmok sang mga handum sang pumuluyo.
Ginhatagan pagtamod sang Presidente nga indi dapat pagbalewalaon ang magagmay nga sahi sang pagpangdaya bangud amat-amat ini nga nagaguba sang katilingban kon sulit-sulit ini nga ginahimo.
Ginsiling sini nga ang pagpakig-away sa korapsyon indi lamang away sang gobyerno kundi away sang tagsa ka pumuluyo.
Nagpanawagan man si Marcos sang tingub nga pagpakig-away batuk sa pag-abuso sa pwesto kag paglapas sa kinamatarung sang mga pumuluyo.
Kadungan sini, ginhatagan pagtamod sang Presidente ang importansya sang paggiya sa mga pamatan-on agud mangin aware sila sa mga social issues.
Dugang pa ni Presidente Marcos nga indi mag-untat ang gobyerno basta may yara sang mga corrupt nga elemento nga nagatuis sang hustisya kag wala ginasapak ang kaayuhan sang mga pumuluyo.
