ROXAS CITY – Wala sang paghulag sa presyo sang bugas sa Teodoro Arcenas Trade Center (TATC) sumugod sa bulan sang Mayo.
Sa interview sang Bombo Radyo kay Mr. Eldelberto Cambe rice retailer sa amu nga merkado, ginsiling sini nga base sa datos sumugod sadtong Pebrero tubob Abril ang presyo sang local rice yara lamang sa P52.00 kada kilo samtang ang imported rice naman P58.00 kada kilo.
Suno kay Cambe, ang ila ginabaligya nga mga imported rice nagikan sa probinsya sang Iloilo samtang ang lokal rice naman ang nagikan sa Panay, Panitan, Maayon kag iban pa nga kaiping nga banwa.
Pahayag pa sini nga ang pagtaas kag pagnubo sang presyohanay sang bugas ang nakabase lamang sa ila ginakuhaan nga supplier.
Isa pa sa ginalantaw nga rason sa pagtaas sang presyo sa tion nga iguon sang kalamidad ang pungsod.
Samtang, bangud aprubado na sang National Economic and Development Authority (NEDA), ang pagbuhin sa duty rate sa bugas sa 15% para sa in-quota kag out-quota rates tubtob 2028, lauman ang pagnubo sa presyo sang bugas sumugod sa bulan sang Hunyo.
Matandaan nga sa karun target sang gobyerno ang P29.00 kada kilo sang bugas para sa mga pigado.
