ROXAS CITY – Ginalantaw sang isa ka vendor sang kandila kag iban pa nga baligya sa tion sang pista minatay sa Banica Public Cemetery nga wala sang mangin pagbag-o sa ila mangin presyohanay.
Ini ang ginpahayag ni Anita Que, 78-anyos, vendor sang kandila, sang mainterview sang Bombo Radyo.
Suno diri, istable ang ila presyohanay sang kandila kun pista minatay ukon ordinaryo lang nga adlaw.
Dugang pa sini, nga dako ang kapiyerdehan nila sang nagligad nga tuig sang ginpasarado ang sementeryo sa bug-os nga pungsod.
Nagabalor sa duha ka bilog nga kandila sa 5 ka pesos (duha-lima) ang pinakabarato nga kandila, ginasundan sang P5, P12, P20 sa nagkalain-lain nga size sang stick candle.
Samtang sa iya ginabaligya nga bulak, may yara man sila sang tig-P100 tubtob P200.
Nahibaluan nga wala pa makapaguwa sang executive order ang lokal nga gobyerno sang syudad sa pag-obserbar sang ‘Undas 2021.’
Sa pihak nga bahin, gin-anunsyar sang Mt. Zion kag Our Lady of Lourdes Memorial Parks, nga magasarado ang ila operasyon sumugod sa Oktubre 29 tubtob Nobyembre 3, sini nga tuig.
