ROXAS CITY, CAPIZ- Ginpatuman sang Department of Trade and Industry (DTI) ang price freeze sa mga nagapanguna nga balaklon sa probinsya sang Capiz kasunod sang pagpaidalom sini sa state of calamity, nga nakasandig man sa gintalana nga layi sa idalom sang Republic Act No. 7581 ukon Price Act.
Sa interview sang Bombo Radyo kay Merian Asas, Provincial Director sang Department of Trade and Industry Capiz, iya ginpahayag nga automatic nga ginpatuman ang price freeze sa sulod sang 60 ka adlaw matapos nga ideklara ang state of calamity agud nga malikawan ang pagsaka sang presyo sang mga nagapanguna nga pagkaon kasubong sang bugas, sardinas, kape, asukal, gatas, sabon, kandila, kag instant noodles.
Suno kay Asas, ginapaandaman man sini ang mga negosyante batok sa overpricing kag hoarding, nga mahimo magresulta sa pagpamatbat sang multa kag pagkapreso.
Pahayag nya, nagapadayon ang ila nga pagpatigayon sang monitoring kag inspeksyon agud masigurado nga nagasunod ang mga tindahan sa gintalana nga mga presyo.
Ginganyat man sang natungdan ang publiko nga i-report ang ano man nga paglapassa ila nga talatapan agud nga mapabilin ang patas nga presyo sa tunga sang kalamidad.
Interviewed by Bombo Francis Biñas
