Ginpahalin na sa posisyon ang principal sang Colonel Ruperto Abellon National High School sa munisipyo sang Laua-an sa Antique nga si Venus Divina Nietes.
Nag-viral sa social media ang nasambit nga principal matapos ginpa-uba niya ang mga graduating senior high school students sang ila mga toga sa mismo nga seremonya.
Suno kay Palace Press Officer Claire Castro, gilayon nga ginhimo sang Education Sec. Sonny Angara matapos ang insidente suno sa mandu ni Pang. Marcos.
Ginpahayag ni Castro nga apisar mahimo pa nga magtudlo sa iban nga buluthuan ang ginatumod nga manunudlo, apang ipaidalom ini sa behaviour evaluation.
Sa nagviral nga video, makit-an ang principal nga naga-anunsyo sa entablado nga indi dapat magsuksok sang toga ang mga manuggradwar base sa guidelines sang DepEd agud mapasimple ang seremonya.
Ginmanduan sini ang mga estudyante nga nagagradwar nga indi magsuksok sang toga kon magsaka sa entablado, rasun nga ginsugata sang indi pag-ugyon sang pila ka mga estudyante kag sang ila mga ginikanan.
May mga estudyante man nga nagsunod, apang nabatian ang singgit sang mga nagapamatok sa mando sang prinsipal.
