PRO6, wala pa sang direktiba sa pagtukod sang Special Investigation Task Group nga maga-iimbestiga sa kaso sang pagtiro-patay kay Atty. Romero
ROXAS CITY – Wala pa sang ginpaguha nga direktiba ang Police Regional Office (PRO6) angut sa ginrequest sang Roxas City PNP nga pagtukod sang Special Investigation Task Group nga magatutok sa pag-imbestigar sa kaso sang pagtiro-patay kay Atty. Edil Julio Romero sa Barangay Culasi, sang tinalikdan nga Biyernes nga adlaw.
Matandaan nga gintiro ang anay abugado samtang ini ang nagakaon sa isa ka karindera sa guha sang Culasi Port sang wala pa nakilala nga suspek gamit ang .9mm caliber pistol.
Suno sa hepe sang Roxas City PNP nga si Police Superintendent Dante Tayco, wala pa sang order naggikan sa PRO6 nga naga-aprubar sa ila nga request.
Ginpahayag sini nga daku kuntani ang mabulig sang pagtukod sang SITG agud mapadalman pa ang ila nga imbestigasyon angut sa nasambit nga kaso.
Sa karon suno kay Tayco, ila na nga ginpa-enhanced ang kuha nga CCTV footage sa diin makit-an ang gunman nga nagluthang kay Romero kag ang duha sini ka mga kaupdanan kalakip na ang nagaduag grey nga SUV nga nagserbi nga ila get-away vehicle.
Ginahulat naman ang resulta sang ballistic examination sa narekober nga duha ka basiyo sang ginapatihan .9mm pistol nga narekober sa ginluntaran sang insidente.
Mahibaluan nga ginakabig nga High Value Target (HVT) Level 3 drug personality si Romero sang Iloilo City Police Office kag ginapatihan miyembro man sang Odicta drug syndicate.
