Kumpirmado na nga yara sa duwa ka mga indibidwal ang ginbawian sang kabuhi sa probinsya sang Capiz bangud sang mamunog nga pagbubo sang ulan kag pagluntad sang baha nga dala sang Bagyo Ramil.
Sa datos nga nakuha sang Bombo Radyo nagikan sa Regional Disaster Risk Reduction and Management Council Region VI Western Visayas, ginpakigbahin diri nga duwa ang napatay bangud sa pagbaha.
Isa diri ang nagikan sa Barangay Dinginan, Roxas City nga amo si Rizaldo Balgos, 44-anyos kag si Mary Mae Urdelas, 22-anyos sang Barangay Malocloc Sur, Ivisan, Capiz. Samtang, yara naman sa 61 ka mga barangay sa probinsya sang Capiz ang apektado sa diin, anom (6) ang nagikan sa banwa sang Dao, isa (1) sa Dumalag, anom (6) sa Maayon, apat (4) sa Panay, lima (5) sa Pilar, piyo (7) sa President Roxas, 28 sa Roxas City, kag apat (4) sa Sigma.
Yara naman sa 3,307 ka mga pamilya tanan ang apektado ukon kabaylo sa 9,665 ka mga indibidwal.
Samtang, padayon nga ginaabisuhan sang mga otoridad ang mga pumuluyo nga mangin aligmat kag padayon sa pagmonitor sa nagakahinabo nga mga pagbaha sa palibot agud nga mapabilin nga alerto.
