ROXAS CITY – Padalman pa sang Roxas City Police Station ang ila nga imbestigasyon natuhoy sa identity sang apat ka mga suspek nga responsable sa pagluthang-patay sa supervisor sang Golden Claw Security Agency nga si Retired Master Sergeant Joniffer Borda sa Barangay Bolo, Roxas City sadtong Hulyo 20, 2020, Lunes nga adlaw.
Ini ang ginpahayag ni Police Master Sergeant Ramil Arcangeles, tagpamaba sang Roxas City Police Station sang mainterview sang Bombo Radyo.
Mahibaluan nga kalakip sa naaresto nga mga suspetsado amo sanday Rogelio Padernal, 39 anyos sang Barangay San Jose, Roxas City nga amo ang ginatudlo mastermind ukon utok-utok kag nagplano sang krimen; Garry Onilan, 39 anyos sang Sitio Bato-bato, Barangay Dulangan, Pilar nga amo ang nagserbi gunman ukon nagpangamot sa pagluthang-patay sa biktima kag Ian Abagatnan, 28 anyos sang Barangay Tacbuyan, Estancia, Iloilo nga nagserbi nga driver sang motorsiklo nga gingamit sa krimen samtang at-large naman ang isa pa ka suspek nga si Romulo Briyol nga amo ang ginatudlo nga nagpa-contact kay Onilan agud himuon ang krimen.
Suno kay Arcangeles nga madamo sila sang nabaton nga impormasyon natuhoy sa mga suspetsado ilabi na kay Onilan nga ginapahayag imbulbado man sa pila ka krimen.
Bangud diri, ginpasalig sang opisyal nga mangin maid-id sila sa ila pagpangusisa kag imbestigasyon agud ma-validate ang ila nabaton nga mga impormasyon.
Sa dugang nga pagpalawsaw sang Bombo Radyo, ginpartida sang apat ka mga suspek ang ila nakuha nga kwarta sa bag sang napatay nga biktima kun sa diin may tag-P30, 000 sanday Padernal, Abagatnan, kag Briyol samtang P40, 000 naman ang kay Onilan.
Nag-amutay pa ang apat kag nagtipon sang P25, 000 nga ila kuntani gamiton nga kapital sa pagduso sang ilegal nga droga.
Mahibaluan nga narekober sang mga kapulisan sa mga suspetsado ang isa ka unit sang motorsiklo, helmet, jacket, 12-gauge shotgun, kalibre .22 nga armas-luthang, kalibre .45 nga armas-luthang kag P25,000 nga cash.
Ginpasakaan na sang panumbungon nga Robbery with Homicide sa City Prosecutor’s Officer sa Roxas City Hall of Justice ang mga suspetsado.
