ROXAS CITY-Ginpasalig ni Administrador sang probinsiya sang Capiz nga pasabton ang dapat namanabat sa tion nga mapamatud-an nga may yara sang kasaypanan ang Bailan District Hospital natuhoy sa kamatayon sang mag-iloy nga Baylen sang President Roxas Capiz.
Sa interview sang Bombo Radyo ginpasalig ni Provincial Administrator Edwin Chinel Monares nga may yara sang manabat sa tion nga mapamatud-an sang fact finding committee nga may yara sang salabton ang Bailan District Hospital sa kamatayon ni Mary Chris Baylen kag lapsag sini.
Suno sa kay Monares nga ginahatagan tubtob Nobyembre 15 sini nga tuig ang gintukod nga fact finding committee agud mag-imbestigar natuhoy sa insidente.
Ginpasalig man ni Monares nga pagatutukan ang nasambit nga insidente agud indi na matabo pa sa iban.
Mahibaluan nga nagpapanaug sang Memorandum Order 145 Series of 2020 sadtong Oktubre 30 si Capiz Governor Esteban Evan Nonoy Contreras agud nga paimbestigahan ang ginaalegar kapabayaan sang Bailan District Hospital sa mag-iloy nga nadulaan sang kabuhi.
Kalakip sa ginmanduan ni Contreras nga magapatigayon sang imbestigasyon amo sanday Dr. Ramon T. Nolasco sang Hospital Management Section; Board Member Esteban Jose B. Contreras, Chairman sang Committee on Health; Atty. Esteban Angeles B. Contreras, Provincial Legal Officer; Mr. Francisco D. Dariagan, PGDH-HRMO kag Dr. Samuel C. Delfin, Provincial Health Officer.
