ROXAS CITY, CAPIZ – Nagapanawagan ang isa ka public health expert sang total ban ukon dalayon nga pagbawal sa online gambling sa Pilipinas sa tunga sang hagna nga mas hugot nga regulasyon nga ginaduso subong sa Senado batuk sa mga online gambling platforms kasubong sang Scatter.
Sa interview sang Bombo Radyo Roxas kay Dr. Philip Ian Padilla, ginpahayag sini nga ang online gambling nagatuga na sang seryoso nga public health crisis sa pungsod, kun sa diin nagadamo ang kaso sang gambling addiction, kalakip na ang mga menor de edad.
Gintumod ni Dr. Padilla ang sistema subong sang online gambling ang madali nga ma-access sang publiko, ilabi na sang kabataan, bangud sa manubo nga minimum bet nga nagasugod sa ₱20 kag madali nga pamaagi sang pag-top up pinaagi sa mga e-wallets.
Samtang, gin-file ni Senator Win Gatchalian ang isa ka hagna nga nagatuyo nga magpatuman sang mas hugot nga regulasyon sa online gambling platforms.
Pila sa mga nakasaad sa hagna amo ang pagtaas sang minimum bet sa ₱10,000, ₱5,000 minimum top-up, pagbawal sa paggamit sang e-wallets sa online gambling transactions, kag pagtaas sang minimum legal age halin 18-anyos padulong sa 21-anyos.
Apisar suportado ni Dr. Padilla ang tinutuyo sang hagna nga mapunggan ang pagka-adik sa sugal, hugot niya nga ginpahayag nga mas epektibo nga solusyon sa gihapon ang total ban ukon dalayon nga pagpa-untat sa operasyon sang tanan nga online gambling platforms sa pungsod.
Suno sa iya, ang subong nga tikang ang mahimo nga makapabuhin lamang sa insidente sang addiction apang indi sini dalayon nga masolusyunan ang ugat sang problema.
Ginhatagan pagtamod ni Dr. Padilla nga ang epekto sang online gambling ang indi lamang pinansyal kundi madalom man ang epekto sa mental health, relasyon sa pamilya, kag kabug-usan nga kalidad sang kabuhi sang mga Pilipino.
Ginapanawagan ni Dr. Padilla sa mga mamalidha nga paminsaran ang long-term nga epekto sang online gambling kag himuon nga nagapanguna nga konsiderasyon ang ikaayong lawas sang pumuluyo sa paghimo sang mga polisa batuk diri.
– Interviewed by: Bombo Lynd-C Bade
