ROXAS CITY – Temporaryo nga ginrelieved sa Roxas City PNP, ang isa ka opisyal sang pulisya matapos ginaalegar nagpangtaya sang armas luthang sa duha ka indibidwal sa Barangay Bato, Roxas City.
Matandaan nga ginkilala ang mga nagreklamo nga sanday Honeyboy Billoso, 44-anyos, mangunguma kag tricycle driver kag residente sang Barangay Tanza Sur, Panay Capiz kag Don Arbolado, 35-anyos, collector sa TATC kag residente sang Barangay Mongpong, sining syudad.
Samtang ang amu nga pulis ang ginkilala kay PSSg Joemar Barrera, yara sa legal nga pang-edaron, non-commission Police officer nga na-assigned sa Roxas City Police Station, kag residente Barangay Bato, Roxas City.
Sa interview sang Bombo Radyo kay Police Lieutenant Colonel Francisco Paguia, hepe sang Roxas City Police Station, ginpahayag sini nga padayon ang ila pagpatigayon sang imbestigasyon angut sa natabo nga insidente.
Suno kay Paguia, maid-id nila ini karun nga ginatutukan bangud ang kaangay sini nga buluhaton indi maayo nga ehemplo sa publiko ilabi na nga isa ka opisyal sang pulisya ang may kahimuan.
Panawagan sini sa mga nakakita sa insidente, makig-angut sa ila talatapan agud matuldukan na kag mahatagan sang hustisya ang nasambit nga mga persona.
Mahibalaun nga hinali lamang nga ginpangtutukan ni Barrera sang armas luthang sanday Billoso kag Arbolado nga nagabakal sa tindahan kag nagapungko sa motorsiklo apang maswerte lamang nga wala ini naglupok matapos nga ginpitik sini ang gatilyo.
