ROXAS CITY – Boluntaryo nga nagsungka sa hanay sang mga kapulisan ang isa ka pulis nga nakatiro-patay sa isa ka mister sa Barangay Sagrada Familia banwa sang Dumarao, Capiz.
Matandaan nga patay ang biktima nga si Renato Pampag, 43 anyos sang nasambit nga lugar matapos maluthangan ni Patrolman Mamerto Arellano, 34 anyos kag pumuluyo man sang nasambit nga lugar kun sa diin natalana nga pagapasakaan sang nagakaigo nga panumbungon.
Nagaguha sa autopsy result sang biktima nga nakaangkon ini sang lima ka mga igo sang luthang tuga sang 9mm nga armas luthang.
Mahibaluan nga duha ka mga igo sa likod, tig-isa sa dughan, butkon kag tiyan ang naangkon sang biiktima.
Sa interview naman sang Bombo Radyo News Team kay Punong Barangay Noel Sudayan nga ginaalegar may yara sang deperensya sa paminsaron ang biktima kun sa diin ginpabulong na ini sa Putotan, Iloilo.
Matandaan nga samtang nagalakat ang suspek kaupod ang ugangan sini kag hinablos sang hinali nga gintambangan ini sila sang biktima.
Ginpahayag nga may yara sang natabo nga pagbinaisay sa tunga sang suspek kag biktima kun sa diin hinali nga ginlabo sang biktima ang nasambit nga pulis.
Nakatigayon nga nakalikaw ang nasambit nga pulis apang natumba ini sa dalan.
Samtang natumba sa dalan si Arellano, gintuyo ini nga lab-on ni Pampag apang naunahan na ini sang nasambit nga pulis.
Nakaangkon sang madamo nga pilas sa kalawasan ang biktima nga gintunaan sang iya nga kamatayon.
Mahibaluan nga si Arellano ang aktibo nga miyembro sang Negros Provincial Mobile Force Company sang Philippine National Police sa Negros Occidental.
