IBAJAY, AKLAN – Indi makita sang Ibajay, Aklan Municipal Police Station nga pulitika ang rason sang pagluthang-patay ni Sangguniang Bayan Member Mihrel Senatin kay Vice Mayor Julio Estolloso.
Sa interview sang Bombo Radyo kay Police Major Rajiv Salbino, hepe sang Ibajay Municipal Police Station, iya ginpahayag nga magkaalyado man ang duha bangud yara sila sa kapareho nga partido.
Wala man sang may nabaton nga report ang kapulisan nga may yara sang personal nga away sanday Senatin kag Estolloso.
Base sa imbestigasyon sang Ibajay PNP, nagsulod si Senatin sa opisina kag namangkot sa staff member sang tanan nga kopya sang ordinansa nga ginpasar sini sa iya nga termino.
Gilayon man niya nga ginpalapitan si Vice Mayor Estolloso kag ginpamangkot, “Vice, anu ang saea kimu?” (“Vice, ano problema mo sa akon?”) antes niya gintiro ang bise alkalde.
Suno kay Major Salbino, ginkakibot lamang sang mga testigo nga nahimo ni SB Member Senatin nga tiruhon ang bise alkalde.
Narekober sa suspek ang glock 17 nga armas nga ginapahayag may mga dokumento apang ini ang i-validate pa sang kapulisan.
Pahayag sang hepe, ginabanta tatlo ang tawo sa sulod sang session hall nga amo ang magatindog bilang testigo sa insidente.
Dugang pa sang natungdan, wala sang closed circuit television (CCTV) camera sa sulod sang session hall kag sa opisina sang bise alkalde kag wala man sang security guard sa sulod sang opisina sang natabo ang pagpangluthang.
Sa subong, indi pa maistorya ang SB Member suno sa kapulisan bangud nagakaurongan lamang ini amo man ang mga testigo.
Ginatinguhaan pa sang Ibajay PNP nga maimbestigaran kun ano pa ang posible motibo sang suspek sa pagluthang patay sa bise alkalde.
Nahibaluan nga wala sang session subong nga Byernes nga adlaw bangud kada Huwebes ini ginapatigayon.
