ROXAS CITY – Naghatag sang reaksyon ang pila ka mga pumuluyo natuhoy sa pagsuspinde sang Sangguniang Panlalawigan (SP) sa pagpatigayon sang special session angut sa pagpaidalom sa probinsya sang Capiz sa state of calamity.
Sa interview sang Bombo Radyo kay Mario residente sang Brgy. Capagao, banwa sang Panitan, ginpahayag sini nga kuntani maaprubahan na sang SP ang state of calamity bangud madamo sang mga pumuluyo ang apektado sang pagbaha kag nagakinahanglan sang bulig ilabi na ang mga mangunguma.
Suno naman kay nanay Jessica, isa ka house wife kag residente man sang nasambit nga barangay, ginpahayag sini nga dapat nga maaprubahan na ang gina-request sang provincial government para mga pumuluyo bangud madamo ang kaluluoy kag naga-antos matapos ang pagbaha nga naeksperesyahan sang kadam-an.
Dugang pa sini, apisar wala na bahaan ang ila puluy-an apektado man sila sa gihapon sang tion nga sang pagbaha bangud indi sila makaguwa bangud wala sila sang maagyan agud makabakal sang ila mga kinahanglanon kag naka-eksperensya sila sang gutom.
Mahibaluan nga yara na sa 9 ka kabanwahanan kag isa ka syudad ang nagdeklarar sang state of calamity. Ini amu ang mga masunod:
1. Cuartero
2. Sigma
3. Panitan
4. Tapaz
5. Dao
6. Pilar
7. Maayon
8. Mambusao
9. Dumarao
10.(9 ka Barangay) sa Roxas City
Kadam-an sa mga pumuluyo ang pabor nga ipaidalom ang bug-os nga probinsya sa state of calamity agud madamo sang bulig nga magaabot sa mga apektado sang pagbaha.
