ROXAS CITY – Nagsabat sa Bombo Radyo ang punong barangay sang Barangay Cabugcabug, Pres. Roxas natuhoy sa natabo nga kinagamo kag tensyon sa tunga nila ni Mayor Receliste “Tanoy” Escolin.
Sa interview sang Bombo Radyo kay Punong Barangay Alfonso Golero nga ginkompronta sini si Mayor Escolin matapos nga nakabaton ini sang impormasyon nga may yara sang mga naga-operate nga heavy-equipment kag naga-ubra sa sulod sang rural health unit.
Suno kay Golero nga tuyo kuntani sini nga istoryahon ang alkalde agud pauntaton ang pag-operate sang mga heavy equipment apang ginaalegar sini nga ginsinggitan kag gintaasan pa ini sang tingog ni Escolin.
Aminado si Golero nga ginsaka sini ang naga-operate sang heavy euipment agud pauntaton apang ginapahayag nga hinali na lamang ini nga ginwakli sang isa sa mga bodyguard ni Escolin.
Kasubong nga ginkadismaya ni Golero ang ginhimo sang alkalde matapos wala ini nagpakig-angut sa iya antes ginpa-operate ang mga heavy equipments.
Ginpanginwala man sini ang alegasyon nga ginhangkat sini ang alkadle sang sumbaganay bangud tuyo gid lamang sini kuntani nga magpakig-istorya.
Ginpanindugan man sang amo nga punong barangay nga wala sang kinamatarong ang munisipyo nga magtandog sang nasambit nga duta bangud pribado kag wala ini ginapanag-iyahan sang banwa.
Dugang pa sini nga ginahimo niya lamang ang iya trabaho bilang administrador sang duta bangud siya ang akigan sang tag-iya kun pahanugotan sini nga tandugon ang duta nga wala sang permiso nagikan sa natungdan.
