ROXAS CITY, CAPIZ- Gin-athag sang Punong Barangay sang Barangay Dayao, Roxas City, nga wala nila ginpabay-an kag ginahatagan nila sang nagakaigo nga igtalupangod ang nagakahinabo nga mga pagbaha sa ila nga lugar kag indi lamang sa Sitio Pagutok.
Sa interview sang Bombo Radyo kay Punong Barangay Wennie Batuampo, sang nasambit nga lugar, iya ginpahayag nga may ginpangtambak na nga buga sa amo nga bahin apang wala pa ini matapos bangud sa pila ka mga rason.
Suno kay Batuampo, bangud nga sang tinalikdan lang, ginbawalan nga magkuha sang buga rason nga nauntat ang pagpatambak.
Pahayag nya, sa pihak nga wala sang buga nga natambak, padayon sa gihapon ang mga paglimpyo sang drainages sa ila nga palibot.
Samtang, padayon ang ila nga koordinasyon sa City Government sa pagpangayo sang bulig agud nga maaksyunan ang pagbinaha nga nagakatabo sa ila nga lugar.
Panawagan naman sini sa mga pumuluyo, nga kun may gusto ipalab-ot nga reklamo, magderetso lamang sa barangay hall kag indi na pag-ipaagi pa sa social media.
Interviewed by Bombo Francis Biñas
