Punong Barangay Richard Arrojado, ginsolusyonan na ang pagbaha sa Purok 1 Barangay Libas,Roxas City

ROXAS CITY -Ginsolusyonan na sang punong barangay sang Barangay Libas Roxas City ang ginareklamo nga pagbaha sang pila ka mga residente sang Purok 1 Barangay Libas sining siyudad.
Ginpahayag ni Punong Barangay Richard Arrojado nga may ginbayaran na ini nga mga indibidwal para manglimpyo sang kanal kag tamborong nga puno sang basura.
Suno pa sa opisyal nga madamo na sang basura nga nagapunong sa buho sang tamburong rason nga indi na makadiretso ang tubig nga nagatuga sang pagbaha sa lugar.
Magluwas diri, suno kay Arrojado nga nagatuga man sang pagbaha ang masami nga paglab-ut sang tubig gikan sa dagat sa mga panimalay sa tion sang taob.
Ginpanginwala naman ni Arrojado nga may pila ka mga pamilya nga gintambakan sang buga ang kanal kag tamburong nga gin-agyan sang tubig.
Samtang tinguhaan naman sang nasambit nga kapitan nga kutkutan sang dako  nga buho agud malapad ang agyan sang tubig.