Gingamit ang pangalan sang Punong Barangay sang Brgy. VII, Roxas City sa ginapahayag identity theft agud magpangtunto.
Sa interview sang Bombo Radyo kay Punong Barangay Nilo Diestro, sang Barangay VII, ginpahayag sini nga gingamit ang iya nga pangalan kag itsura sa isa social media account kun sa diin may ngalan nga “Kap Nilo”.
Dugang pa sini, nagapangayo pa suno ini sang kwarta sa mga pila ka kaabyanan kag himata ni Kap Nilo pinaagi sa isa ka e-wallet.
Si Punong Barangay Diestro ang ika-duha na nga Punong Barangay sa syudad sang Roxas ang nabiktima sang kasubong nga pagpanunto.
Nagapati naman si Diestro, nga isa lang ka tawo ang yara sa likod sang pagpanggamit sang ila pangalan ni Kapitan Holce sang Brgy. VIII.
Panugyan sini sa publiko, indi magsalig insigida sa mga naga-message ilabi na kun may kaangtanan sa kwarta.
