PRESIDENT ROXAS, CAPIZ- Gin-athag sang Punong Barangay sang Vizcaya, President Roxas, Capiz ang mga alegasyon nga ginahaboy batuk sa iya sang pila ka mga residente nga iya nasakupan.
Sa interview sang Bombo Radyo kay Punong Barangay Melchor Ubal, iya ginpahayag nga wala sang katuuran ang ginapahayag pinili-ay sa pagpanglista para sa ayuda.
Suno kay Ubal, ang nasambit nga lista ang nag-agi sa pagpangusisa anay sang Barangay Health Workers (BHW) antes nga ginapasa sa Barangay Secretary.
Pahayag pa niya, ang mga nagpa-bombo indi man apektado bangud nga dagko man sini ang ila nga mga balay kag yara sa matag-as nga bahin rason nga wala man ini ginsulod sang baha.
Nahibaluan nga sang Disyembre 2, 2025, ginpanagtag ang ayuda sa mga naapektuhan sang bagyo sang ila nga barangay.
Nagpanawagan naman si Kapitan nga indi pagbasulon ang sekretarya bangud nga ang lista halin sa BHW mismo kag amo lang man ang pagpasa sa DSWD.
Interviewed by Bombo Francis Biñas
