ROXAS CITY – Naghatag sang iya nga paathag ang punong barangay sang Barangay Jumaguicjic, Roxas City natuhoy sa pagpanukot sini sa mga residente sa ila barangay sang 30 pesos kada bulan nga ginahatag sa mga barangay tanod nga nagapasiguro sang kalinong kag katawhay sa ila nga lugar.
Ginkompirmar ni Punong Barangay Ligayan Condez ang pagpanukot sang nasambit nga kantidad nga nagsugod suno sa iya sadtong Oktubre sang nakaligad nga tuig 2018.
Suno sa iya nga ginkasugtan man ini sang mayorya sang mga pumuluyo sa ila ginpatigayon nga barangay assembly apang wala lamang sila sang ginpirmahan nga dokumento.
Ginpahayag pa ni Condez nga indi man tanan nga mga residente ang nagareklamo apang aminado ini nga may pipila sa mga pumuluyo nga nagapanindugan nga indi magbayad.
Apang suno kay Condez nga sa iya pag-upod sa pagpanukot sa mga pumuluyo, wala man nila ginapwersa ang mga residente nga indi magbayad apang ginapaathag sini sa ila nga kinahanglan nila magbuligay para sa kaayuhan sang barangay.
Suno diri nga may yara sang gin-aprubahan nga resolusyon ang konseho sang barangay para sa pagpanukot sa mga pumuluyo.
Apang suno kay Condez nga kun magareklamo man lang ang mga residente, posible nga ipauntat na lamang nila ang pagpanukot sang amo nga kantidad.
Mahibaluan nga may yara sang kapin 35 ka mga barangay tanod ang amo nga barangay nga ginahatagan sang tag-200 pesos sa kada gab-i nga sila ang maga-duty.
Samtang ginkompirmar man sini ang pagpanukot sang 10 pesos sa mga residente para sa pagpangkolekta sang ila nga basura. Ang amo nga kantidad suno sa iya ang ginahatag naman sa mga garbage collectors.
