ROXAS CITY – Wala mapunggan ni Punong Barangay Alfredo “Minong” Albaladejo sang Barangay Tiza, sini nga syudad, nga ipalab-ot ang kalain sang buot sang iya Barangay Health Workers (BHWs) bangud sa indi patas nga paghatag sang insentibo sang City government.
Sa interview sang Bombo Radyo kay Albaladejo, ginpahayag sini sa 22 ka mga rehistrado nga BHWs sa ila barangay, 6 lang ang ginhatagan sang tag-P2,000 nga pa-insentibo nagikan sa lokal nga gobyerno sang syudad.
Masakit lang suno sa iya, nga ang mga wala mahatagan amu pa nagatrabaho sang maayo.
Nahibaluan nga ang 16 nga mga wala mahatagan amu ang mga nagsuporta sa iya sang eleksyon kag nagpanindugan nga pula ang ila gusto, samtang ang 6 nga nahatagan ang nagsuporta sa blue.
Dugang pa suno sa kapitan sa ginkalain sang buot sang wala mahatagan sang insentibo bangud natukiban sang mga ini nga wala gin-renew ang ila PhilHealth, sang tuig 2019 pa.
Wala man ang mga ini nagabaton sang ‘bugas para sa taga-Roxas.’
Bangud sini, nagpadulong ang mga BHW’s sa Punong Barangay kag nagtuad nga maga-resign nalang, apang gin-eksplekaran ini ni Albaladejo angut sa ila estado.
Luyag lamang sang Barangay Kapitan nga ipalab-ot sa City government nga mangin patas sa ila pagpanerbisyo kag dulaon ang pamulitika.
