SAPIAN, CAPIZ- Ginapaidalom sa karon sa isa ka maid-id nga imbestigasyon ang ginapahayag natabo nga ‘blasting’ nga indi lisensyado sa isa ka quarry site sa Barangay Poblacion, Sapian, Capiz.
Sa interview sang Bombo Radyo kay Mayor Jose Villanueva, sang Sapian, Capiz, iya ginpahayag nga kasunod sang nagalapta nga video sa social media may kaangtanan sa ginapahayag indi lisensyado nga ‘blasting’, gilayon ini nga nagpapanaog sang isa ka Executive Order sa diin nga nagamando sa pagpatigayon sang imbestigasyon sa amo nga site.
Dugang pa sini, ang amo nga imbestigasyon ang may katuyuan nga hibaluon sang maayo kun ang amo nga quarry ang wala nagalapas sa mga patakaran sang pagpatigayon sang pila ka mga aktibidad.
Ginpakigbahin man sini, nga antes pa man sya magpungko sa pwesto bilang alkalde sang tuig 2022, yara na ini suno sa iya ang amo nga quarry site. Apang, ginmando sang gobernador nga temporaryo nga pauntaton ang operasyon sang tanan nga mga sahi sini sa probinsya kag nagsunod naman ini suno sa iya kag liwat naman ini nga nag-operate.
Gin-athag man sang alkalde nga wala nagahalin sa ila nga talatapan ang ano man nga sahi sang permit may kaangtanan sa operasyon sini bangud nga suno sa iya, ang Capiz Provincial Environment and Natural Resources Office (CAPENRO) ang may kinamatarong sa amo nga bahin apang bilang alakalde suno iya, wala naman sya nagpabaya angut sa amo nga hitabo rason nga ginpapanaog sini ang amo nga Executive Order.
Samtang, ginasiguro naman ni Mayor Jose Villanueva sa iya sini mga pumuluyo nga nasakupan nga mahatagan sang nagakaigo nga igtalupangod ang amo nga hitabo sa ila nga banwa, partikular sa nasambit nga barangay.
In an interview with Bombo Francis Biñas
