ROXAS CITY – Ginka-alarma sang mga kapulisan ang pila ka mga insidente sang pagpangluthang nga nagluluntad sa syudad sang Roxas.
Sa interview sang Bombo Radyo kay PCpt. Marvin Balmes, Investigation Officer sang Roxas Component City Police Station (RCCPS), kasubong nga ginapalampas lamang sang mga nagahimo sang krimen ang ginapatigayon nga police visibility ukon pagpatrolya sang mga kapulisan.
Suno diri, padayon sa gihapon ang pag-imbestigar sa pila ka mga shooting incident agud mahibaluan ang pagkakilanlan sang mga suspek ilabi na sa insidente kun sa diin dalahig ang mga menor de edad.
Aminado man si Balmes nga indi bastante ang numero sang kapulisan apisar ipahamtang pa ini sa tagsa ka barangay bangud sa kalaparon sang syudad, gani ginahinyo sini ang mga pumuluyo nga mangin alisto kag magpanilag sa palibot.
Ginpakigbahin man sini ang importansya sang Closed-circuit television(CCTV) kun sa diin daku ang mabulig sini bilang mabaskog nga ebidensya agud gilayon madakpan ang mga kriminal.
Ginahinyo man ni Balmes sa ka-barangayan nga mangin aktibo ang mga tanod agud magnubo ang tsansa sang mga kriminal sa paghimo sang krimen.
Wala naga-untat ang mga checkpoints sa ila operasyon agud masiguro ang nagasulod kag nagaguha sa syudad.
Nagapasalamat ang imbestigador sa mga pumuluyo nga nagahatag impormasyon, sa mga nagasuporta sa ila ginapatigayon nga police operations, amu man sa mga biktima nga nagakooperar kag nagalaom ini nga magpadayon pa ang kooperasyon.
Dugang pa sini nga ginarespeto sang mga kapulisan ang mga malain nga komento sang mga pumuluyo batuk sa ila, bangud kinamatarong ini sang isa ka indibidwal.
Ginasiguro ni Balmes nga mapabilin ang kalinong kag katawhay sa syudad sang Roxas.
