Nagpabutyag sang pagkabalaka kag kaluoy ang isa ka tricycle driver sang natabo nga pagka-aresto kay anay Presidente Rodrigo Duterte kag ginbyahe padulong sa International Criminal Court (ICC).
Sa interview sang Bombo Radyo kay Bryan Nabio, 36-anyos, 10 ka tuig na nga tricycle driver kag residente sang barangay Baybay, Roxas City, ginpahayag sini nga wala nalang kun tani gintugutan nga ipa-aresto kag ginbyahe pa sa malayo bangud magluwas sa may edad na ini maluya pa ang lawas.
Pahayag pa sini nga kun siya pamangkuton indi deserve sang anay Presidente ang natabu sa iya bangud sa kaso nga iya gina-atubang sa karon batuk sa war on drugs sa tion sang iya administrasyon ginhimo lamang niya ang iya nga obligasyon bilang amay sang pungsod.
Dugang pa ni Nabio nga tion ni Duterte, bilang isa ka amay, kumpyansa sya nga luwas sa katalagman kag wala sang may matabo nga malain sa iya nga mga kabataan bisan pa sa kagab-ihon.
Nabatyagan man sini ang malinong kag matawhay nga palibot sang administrasyon sang anay Presidente kag nagnubo man ang numero sang mga kriminalidad nga nagkalahinabo sa pungsod.
Kun ikumparar suno ang administrasyon sang anay presidente Duterte kag ang sa subong nga administrasyon ni Presidente Marcos, mas kampante sya sa tiyempo ni Duterte.
Mahibaluan nga sang 2016 Election, ginboto sini si Duterte bilang Presidente bangud nagapati ini nga isa ka maayo nga lider si Duterte kag ini ang iya napamatud-an sa pila ka tuig nga pagserbesiyo sang anay Presidente.
Samtang sa pihak nga bahin, gin-boto man suno sini si Presidente Marcos sang 2022 Election bangud sa nagpati kag nagalum ini sa mga promisa nga ginbuy-an ni Presidente Marcus sat ion sang iya kampanya, apang napaslawan ini nga matuman kaangay sang barato nga presyo sang mga balaklon kasubong sang bugas nga ginpromisa sini nga posible magnubo tubtob 20 pesos ang kada kilo.
Sa karon, ginapangamuyo sini nga makabalik na ang anay presidente Duterte sa pungsod.
