Gin-aresto sang mga otoridad sa Iran ang isa ka realtor kag ginpasirado ang iya nga real estate business matapos ini nga naulamid sa isa ka real estate deal kun sa diin nangin instant owner sang apartment ang isa ka ido.
Nangin kontrobersiyal ang isa ka real estate deal sa Iran matapos naglapta sa mga social media websites ang video sang pagbaligya sang apartment kun sa diin isa ka ido ang bag-o nga tag-iya sini.
Makit-an sa nasambit nga viral video ang mag-asawa nga Iranian nga ginapamana sa ila nga ataman nga ido nga si Chester ang ila nga apartment. Makit-an man sa video nga gingamit ang paw ukon tiil ni Chester nga may ink para itatak sa papeles bilang “pirma” sini.
Madamo sang detalye hanungod diri ang indi malinaw pero ginkumpirma sang isa ka Iranian news agency nga lehitimo ang real estate deal kag nakapangalan na kay Chester ang apartment.
Bangud diri, nagpaguha sang court order ang mga otoridad nga arestuhon kag pasiraduhan ang business sang realtor.
Sa isa ka interview kay Iranian Deputy Prosecutor General nga si Reza Tabar, ang pagbaligya kag pagpamana sang propedad sa isa ka ido ang wala sang legal nga basehan kag isa ini ka bayolasyon sa moral values sang mga Iranian.
