ROXAS CITY – Ginklaro sang Municipal Social Welfare and Development (MSWD)-Head nga wala sang kaangtanan sa ayuda sang Bagyong Agaton ang ginhiwat nga releasing sang P1,000 nga financial assistance sang sabado kag dominggo sa banwa sang Pontevedra.
Ini ang ginpahayag ni Mr. Ricky Parcon, MSWD Head sang Pontevedra sang mainterview sang Bombo Radyo.Suno diri, ang ginpanagtag nga ayuda sang weekend ang para sa mga pigado nga apektado sang COVID-19 pandemic, ngawala sang may nabaton nga ayuda sumugod sang tuig 2021 tubtob 1st quarter sang 2022 apang, na-delay lamang ini bangud sa kakulangan sang budget.
Mahibaluan nga ang nasambit nga financial assistance ang nagikan sa national government pinaagi sa DSWD Region 6 para sa 4,010 nga mga benepisaryo.
Gin-athag man ni Parcon, nga mahimo makabaton man ang mga benepisaryo sang nasambitan nga ayuda sang financial assistance nga igahatag para naman sa mga apektado sang Bagyong Agaton.
Samtang, ginpahayag sini nga wala pa natalana kun san-o iga-release ang ayuda para sa apektado sang bagyo bangud wala pa na-download ang pondo kun sa din 12,096 pa nga mga pamilya ang mga benepisaryo.
Matandaan nga 375 ka mga pamilya pa lamang ang nakabaton sang ayuda sumugod sang pag-abot ni President Duterte sa amo nga banwa.
Naglab-ot naman sa P2,624,024 ang nagkalaguba nga propiedad, masobra P16 ka milyon sa sektor sang agrikultura kag ginabulubanta P35,787,800 sa fisheries ang nahalitan sang Bagyong Agaton.
