ROXAS CITY – Ginpaathag sang Provincial Information Officer sang gobyerno-probinsiyal sang Capiz ang Resolution No. 43 nga naga-amyenda sang pila ka mga guidelines sa mga general community quarantine (GCQ) kag modified general community quarantine (MGCQ) areas.
Ginklaro ni Atty. Atlas Catalan nga ang pag-amyendar sang nasambit nga guidelines ang gikan mismo sa national Inter-Agency Task Force (IATF) gani kinahanglan man ini nga sundon sang gobyerno-probinsiyal sang Capiz.
Isa sa importante nga gin-amyendar amo ang liwat nga pagdumili sa pagguwa ukon 24-hour curfew sa balay sang mga naga-edad 21 anyos panubo kag mga senior citizens.
Ginadumilian man nga magguwa ang mga may immunodeficiencies, comorbidities, mga nagabusong kag iban pa nga health risks.
Apang mahimo naman nga makaangkon sang special quarantine pass nga iga-isyu sang mga barangay kapitan.
Hugot nga ginpanindugan ni Catalan nga indi mahimo maka-biyahe ukon maglagaw ang mga wala sang special quarantine pass.
Nagpangabay man ini sa mga eskwelahan nga ipaiway anay ang pagpa-comply sa mga requirements sa mga estudyante agud indi mapilitan nga magguwa sa ila balay ang mga naga-edad 21 anyos panubo bangud gintalana pa man sa bulan sang Agosto ang opening of classes.
Gintuad man sini ang pagbalik na sang religious gatherings, operasyon sang mga establisyemento-komersiyal kag balik-biyahe sang mga pampubliko nga salakyan sa baylo i-obserbar gid ang mga health protocols kag pag-limita lamang sa 50 percent capacity.
Nagpangabay si Catalan sa publiko nga sundon na lamang ang nasambit nga pagsulundan bangud ini ang pamaagi man agud maamligan ang ikaayong-lawas sang tanan batuk sa coronavirus disease (COVID-19).
