ROXAS CITY – Ginatugyan na sa otoridad sang 71-anyos nga retirado nga maestra ang pagkadakop sang mga nagbiktima sa iya nga ginpahayag miyembro sang budol-budol.
Sa interview sang Bombo Radyo kay retired teacher Erna Inocencio, sang Barangay Jagnaya, Jamindan, Capiz, ginsiling sini nga wala gid sini ginlauman nga sa iya pang-edaron mabiktima pa ini sang kaangay nga modus.
Pagsaysay sini nga mahilig man ini magkomento sa mga balita sa radyo, kaangay sa mga nagapadala-dala sa mga scammer, nga suno sa anay manunudlo, kuntani sa una palang indi na magpati.
Tubtob, nga natabo na ini sa iya kun sa diin sadtong adlaw antes ang Valentine’s day nagpadulong ini sa syudad sang Roxas agud magpamakal sang kinahanglanon sa ila balay, apang may nagpalapit sa iya nga lalaki kag nagpakilala nga abyan sang iya subang nga bata, tubtob nga ginhagad ini nga magsulod sa SUV nagaduag puti kag ginpakilala sa isa pa ka suspek nga nagpakilala nga isa ka doktora kag gintan-ayan nga pagatsekyaron ang ikaayong-lawas.
Diri na nagsugod ang tanan nga nadala na ang biktima sa mga istorya kag natigayon nga masugid ang iya income kag tinipo nga kuwarta, kag nagpadulong pa sa mismo balay sang biktima kag nataban ang P135,000 tanan nga kuwarta, alahas kag cellphone.
Mensahe ni Inocencio ilabi na sa mga makaangay sini nga senior citizen, nga indi mag-isahanon sa pagguwa, kun mahimo magpaupod sa himata kag indi gid mag-istorya sa indi kakilala agud mapahilayo sa budol-budol.
Sa karon, wala pa matumod ang ginapahayag apat tanan ka mga suspek, kalakip ang driver sang SUV nga puti.
