ROXAS CITY – Pito tanan ka mga patal nga pilas ang naangkon sang isa ka retirado nga army nga ginluthang-patay sang wala pa matumod nga mga riding-in-tandem sa Barangay Bolo, Roxas City.
Ini ang ginpahayag ni Police Master Sergeant Ramil Arcangeles, tagpamaba sang Roxas City Police Station sang mainterview sang Bombo Radyo.
Kasunod ini sa pagpaidalom sa autopsy examination sa bangkay sang biktima nga si Junifer Borda, isa ka retirado nga suldado kag naga-trabaho bilang officer-in-charge sa Gold Claw Security Agency.
Suno kay Arcangeles, sa pito ka igu sang luthang sa lawas sang biktima, anom diri ang sa likod kag isa naman ang sa tangkugo.
Apat sa mga igu sini ang ‘through and through’ ukon naglapos gid sa iya nga lawas.
Base sa maid-id nga imbestigasyon sang mga kapulisan kag sa pag-tsekyar sa closed-circuit television (CCTV) footages, kapin duha ka metros lamang ang antad sang mga suspek sa pagluthang sa biktima.
Ginapahayag nga ang backrider sang motorsiklo ang nagserbi nga gunman ukon nagpangamot sa pagluthang sa biktima nagserbi nga driver ang kaupod sini.
Indi man malayo nga posible kilala sang biktima ang mga suspek bangud kasubong nga gin-monitor ang hulag sini ilabi pa nga may dala siya nga dako nga kantidad sang kwarta nga nagalab-ot sa mas o menus P100, 000.
Ang nasambit nga kwarta ang ipa-sweldo kuntani sa mga guwardiya sa idalom sang ginatrabahuan nga ahensiya sang biktima.
Suno kay Arcangeles nga ginturn-over naman sa Provincial Crime Laboratory ang narekober nga mga basiyo sang kalibre .45 nga armas-luthang sa ginluntaran sang insidente para mapaidalom sa ballistic examination.
Gindugang pa sini nga nagapadayon man ang ila maid-id nga imbestigasyon agud matumod ang mga suspetsado sa nasambit nga krimen.
