ROXAS CITY- Ginadalian na ang pagpatapos sang Roxas Memorial Provincial Ospital – Lanot agud magahatag sang serrbisyo sa mga pumuluyo sang probinysa sang Capiz.
Sa interview sang Bombo Radyo Roxas kay Dr. Florence Luching, Officer in Charge sa Roxas Memorial Provincial Ospital, ginpahayag nga yara na 90 porsyento ang ground floor sa amo nga bag-o nga ospital kag mahimo na ini nga magamit, kinahanglan na lamang nga maplastar ang mga gamit sa sulod.
Nag-acquire sang bag-o nga mga gamit sa nasambit nga ospital ang gobyerno probinsiyal kag ginbag-o ang mga daan nga mga gamit.
Magapahamtang man sang 15 ka mga unit sang dialysis machine nga mahimo maghatag serbisyo sa mga pasyente nga nagapadialysis bangud igatransfer sa RMPH-lanot ang mga ini sa tion nga matapos na amo nga ospital.
Ini ang tungod man sa hinyo sang mga pumuluyo nga mga kubos sa gobernador nga indi makasarang sa pagbayad sa mga pribado nga ospital sa pagpadialysis.
Apang sa subong ginapangabay sang gobernador nga kun mahimo magapabilin anay ini sa pribado nga ospital samtang wala pa matapos ang bag-o tukod nga balay bululngan.
Madamu sang mga serbisyo ang igadugang sang gobyerno probinsyal para sa mga pumuluyo sang probinsya sang Capiz, kasubong sang eye center, HIV patient center, cancer center kag iban pa.
Ginpahayag man sini nga well-functioned ang mga gamit nga gin-acquire nga igapahamtang sa amo nga ospital.
Sa karon, ginatinguhaan sang gobyerno probinsyal nga makahatag sang dekalidad nga serbisyo ilabi na sa mga pumuluyo nga wala sang ikasarang sa pagbayad sang mahal sa mga pribado nga ospital. //
