ROXAS CITY-Ginmandu sang Department of Environment and Natural Resources-Environmental Management Bureau (DENR-EMB) ang pagpakuha sang mga ginpanghaboy nga mga hazardous wastes sa likod sang Out Patient Department sang Roxas Memorial Provincial Hospital sa Barangay Lanot, Roxas City.
Ini ginpahayag ni Engr. Marlon Bonite, head sang Solid Waste and Management Division sang DENR-EMB sang mainterview sang Bombo Radyo.
Ginpahayag ni Bonite nga naglisensiya sa iya si Mr. Christian Cyril Relacion, Pollution Control Officer sang RMPH nga sug-an ang nasambit nga mga hazardous waste apang nagpamalibad si Bonite bangud bawal nga sug-an ang mga basura.
Gindugang pa ni Bonite nga gin-abisuhan sini si Relacion nga magpakig-angut sa mga accredited nga mga transporter kag treater sang mga hazardous wastes sa siyudad sang Iloilo.
Apang ginkakibot sini nga ginhaboy na ang mga basura sa likod nga porsyon sang OPD-Buiding sang nasambit nga ospital sa Barangay Lanot.
Gin-athag ni Bonite nga may yara sang mga nakaigo nga protocol nga ginasunod sa paghaboy mga hazardous wastes kag hugot nga ginadumilian ang paghaboy sini sa mga lugar nga may yara sang mga panimalay.
Samtang magapapanaog naman sang notice of violation ang DENR-EMB sa pamunuan sang RMPH kag igapatawag sa isa ka technical conference.
