Naghatag sang pahanumdom ang Roxas City Disaster Risk Reduction and Management Office (CDRRMO) sa publiko kaangot sang mataas nga heat index sa syudad sang Roxas.
Ini matapos naglab-ot sa 40 °C ang nabatyagan nga heat index subong nga adlaw.
Sa interview sang Bombo Radyo kay Mr. Gilbert Francisco Fernando, Head sang Roxas City Disaster Risk Reduction and Management Office (CDRRMO), iya ginpahayag nga ang 40 °C nga heat index nga nabatyagan ang lakip sa extreme caution category kun sa diin may malain nga epekto kun madugay nga mabulad sa initan.
Suno kay Fernando, limitahan ang pagpatigayon sang mga outdoor activities kag likawan ang pagwa sa panimalay sa tion sang peak heat hours halin las 10 sang aga tubtob las-4 sang hapon.
Pahayag pa niya, nakastanby man ang tanan nga katapo sang ila talatapan sa tion nga may maglain ang pamatyag kag nagakinahanglan sang bulig.
Nagpanawagan man ang natungdan sa publiko nga mag-inom sang madamu nga tubig kag maggamit sang payong ukon kalo agud malikawan ang ano man nga sahi sang heat-related illness.
