ROXAS CITY – Ginpapasar sa sesyon sang Sangguniang Panlungsod sang Roxas City ang Resolution No. 065-2020 nga ginduso ni City Councilor Albert Gregory Potato.
Ang nasambit nga resolusyon ang nagapatuhoy sa pagpangabay kag pagganyat sa publiko nga maga-dine-in sa mga kalan-an kag iban pa nga food and beverage establishements sa pagdala sang iya kaugalingon nga ‘utensils’ bangud sa pamahog sang coronavirus disease (COVID-19).
Sa nasambit nga sesyon, ginpahayag ni Potato nga magluwas sa pag-obserbar sang physical/social distancing kag pagsuksok sang face masks sang mga customers, tuman man ka importante nga sa baylo maggamit sang utensils sang isa ka establisyemento, magadala na lamang sang iya kaugalingon nga gamit sa pagkaon ang isa ka customer.
Mas dako suno diri nga risgo ang paggamit sang food utensils nga naggamit na sang iban nga tawo sa pag-angkon sang balatian bangud indi masiguro kun na-sanitize kag na-disinfect ini sang ensakto.
Suno pa sa konsehal nga plano sini nga magpapasar sang isa ka ordinansa agud hugot gid nga mapatuman ang nasambit nga pagsulundan.
Mahibaluan nga kasunod sa pagpaidalom sa Modified General Community Quarantine (MGCQ) sa probinsiya sang Capiz, ginpahanugutan na ang pagdine-in sa mga food and beverage establishments.
