ROXAS CITY, CAPIZ- Preparado na para sa nagahilapit nga paskwa kag bag-ong tuig ang Roxas City Disaster Risk Reduction and Management Office.
Sa interview sang Bombo Radyo kay Mr. Gilbert Francisco Fernando, Head sang Roxas City Disaster Risk Reduction and Management Office, iya ginpahayag nga 24/7 sila nga preparado sa paghatag sang bulig sa mga nagakinahanglan ilabi na sa subong nga yuletide season.
Suno kay Fernando, naka-activate naman ang tagsa ka mga katapo sang mga kabarangayan sa syudad sa pagbantay sang publiko para sa malinong, matawhay kag luwas sa katalagman nga pagselebrar sang paskwa kag bag-ong tuig.
Pahayag niya, naka-koordinar naman ang ila nga talatapan sa City Health Office, Roxas Component City Police Station kag Bureau of Fire Protection Roxas City agud nga masigurado gid ang safety sang publiko.
Nagapanawagan naman ang natungdan sa publiko nga mangin responsable sa tanan nga ginahimo sa pagselebrar sang amo nga mga okasyon agud nga makalikaw sa kun ano man nga sahi sang insidente ang posible nga magluntad.
Interviewed by Bombo Sunnie Mae Constantino Batencila
