ROXAS CITY, CAPIZ- Naghatag sang relief goods ang Roxas City Government sa mga nasunugan sang balay sa Sitio Candelaria, Barangay Baybay, Roxas City.
Ang amo nga puluy-an ang ginapanag-iyahan ni Efiania Echona.
Sa interview sang Bombo Radyo kay Punong Barangay Erwin Oroceo, sang nasambit nga barangay, iya ginpahayag nga personal nga nagpadulong ang mga katapo sang City Social Welfare and Development Office, (CSWDO) kag City Disaster Risk Reduction Management Office (CDRRMO) agud idul-ong ang amo nga bulig.
Suno kay Oroceo, tatlo ka mga indibidwal ang naapektuhan sang sunog apang mga tumandok ini sang banwa sang Dao, Capiz kag temporaryo lang nga nagapuyo sa amo nga lugar.
Dugang pa nya, nagadihon na sa subong ang lokal nga gobyerno para sa dugang bulig nga ihatag sa mga nasunugan.
Pahayag pa sang natungdan, ang sunog indi tiliawan, rason nga ipabilin gid nga wala sang kalayo ang dapog kag wala sang may nakapangsaksak nga kagamitan antes nga magkatulog ukon bayaan ang puluy-an agud nga malikawan ang sunog.
Interviewed by Bombo Sunnie Mae Constantino Batencila
