ROXAS CITY – Padayon nga ginapatuman sang Roxas City Government ang pagdumili sa pagbutang sang ngalan, initials kag dagway sang mga politiko sa tanan nga proyekto kag propiedad sang gobyerno sa syudad.
Sa interview sang Bombo Radyo Roxas kay Mr. Melvin Galagate, Head sang Roxas City Communication Group, ginpahayag ang nasambit nga polisiya ginpabakod agud malikawan ang pamulitika nga nagakuha sang kredito halin sa mga proyekto nga ginatukod gamit ang buwis sang mga pumuluyo.
Matandaan nga ini ang labing-una nga Executive Order nga ginpagwa ni Mayor Ronnie Dadivas sang Hulyo 8, 2019, nga nagadumili sa paggamit sang pangalan, imahe ukon logo sang mga personalidad sang gobyerno sa tanan nga proyekto kag propiedad.
Lakip diri ang mga elective kag appointive officials, mga permanent kag temporaryo nga empleyado sang lokal nga gobyerno, upod na ang kabarangayan.
Hugot nga ginabawalan ang pagbutang sang ngalan ukon dagway sa billboards, signage, information materials, mga ginaproponer, on-going kag nakumpleto nga proyekto.
Dugang pa sini, indi man pwede nga ibutang sa mga salakyan nga ginapanag-iyahan ukon ginapagamit sang gobyerno pareho sang police cars, ambulansya, fire trucks, multicabs, barangay vehicles kag iban pa nga opisyal nga behikulo para sa serbisyo publiko.
