ROXAS CITY -Liwat nga magapatigayon sang clearing operation ang gobyerno sang siyudad sa mga illegal structures kag mga illegal settlers nga nahamtang sa kilid sang mga kasubaan nga sakop sang Roxas City.
Ini ang ginpahayag ni City Engineer Noel Laminares sang City Engineers Office sang mainterview sang Bombo Radyo.
Ginkompirmar ni Laminares nga liwat nga nagdamo ang mga illegal settlers sa kilid sang suba bangud magluwas nga nagdugang ang mga nagpatindog sang mga balay sa kilid sang suba, liwat nagbalik ang mga indibidwal nga gin-relocate sang nagligad nga administrasyon.
Magluwas diri, nagdugang man ang mga illegal structures nga ginpahamtang sa kilid sang kasubaan.
Ginkompirmar man ni Laminares nga may pila ka mga illegal settlers nga ginpadal-an na sang notisya nga natalana nga iga-relocate.
Ang nasambit nga lihok ang kadungan sang pagbinaha-baha sa siyudad kun sa diin isa sa mga ginatunaan sini amo ang mga basura gikan sa mga illegal settlers nga naga-istar sa kilid sang kasubaan.
