BOMBO ROXAS – Ginkumpirmar ni Roxas City Mayor Ronnie Dadivas nga nakasumite na sila sang pila ka mga ginapangayo nga dokyumento para sa pagbakal sang COVID-19 Vaccine gikan sa AstraZeneca nga magahalin sa United Kingdom (UK).
Sa interview sang Bombo Radyo Roxas sa alkalde nga pagahulaton nalang sang city government ang tion nga magapatigayon na sang pirmahanay nga nagaserbi tripartite agreement sa tunga nila sang tagdumalahan sang AstraZeneca.
Ginpahayag ni Dadivas nga wala sila sang rason nga padugayon pa ang pagbakal sang bakuna kontra COVID-19 bangud may gin-alokar naman diri nga budget ang gobyerno sang syudad kun sa diin nalakip sa gin-aprubahan nga 2021 Budget.
Nagalaum man ini nga yara na sa waitlisted ang syudad sang Roxas para sa pagbaton sang nasambit nga bakuna.
Mahibaluan nga may tatlo ka mga COVID-19 Vaccine nga ginpilian ang syudad sang oras antes nagdesisyonan nga magbakal sa AstraZeneca.
Suno kay Dadivas nga kun magbakal sang bakuna, nagakadapat nga lantawon ang presyo, efficacy, ang estado sang pagtransport kag ang pagpasiguro sang storage place sa tion nga magaabot sa isa ka lugar.
Suno diri nga ang mga nagaedad 18 pataas ang nagakadapat nga magpabakuna kontra COVID-19.
Ginpasalig man ni Dadivas nga magapanguna nga sa tion nga mag-abot sa syudad ang bakuna, magapanguna ini sa pagpaturok sang bakuna agud maipakita sa mga pumuluyo nga wala sang dapat kahadlukan sa pagpabakuna.
Matandaan nga P60-M ang ginpain nga budget sang gobyerno sang syudad para sa pagbakal sang bakuna kun sa diin 70% ang prayoridad nga mabakunahan nga ginalakipan sang mga medical health workers, uniformed personnels, social workers, government kag non-government frontliners, senior citizens kag mga indigent population ukon pigado.
